Industria Arloa, enpresen lehiakortasuna indartzeko
Goierriko industria babestu, bultzatu eta dinamizatzea da Goiekiren Industria Arloaren egiteko nagusia. Horretarako, eskualdeko enpresei gertuko aholkularitza, zerbitzuak eta hainbat baliabide eskaintzen dizkie, haien beharrei erantzuteko eta etorkizuneko erronkei aurre egiten laguntzeko.
Goiekik urteak daramatza Goierriko industria-sarearen garapena sustatzen eta eskualdeko enpresen bidelagun izaten. Industria Arloaren bidez, enpresen eguneroko jardueran sortzen diren beharrei erantzuteaz gain, etorkizuneko proiektuak eta erronkak bideratzeko laguntza eskaintzen du.
Enpresa bakoitzak bere errealitatea, beharrak eta erronkak ditu. Horregatik, Goiekik banakako laguntza eta aholkularitza eskaintzen du, egoera bakoitzerako irtenbiderik egokiena bilatzeko.
Kudeaketarekin lotutako erronketan laguntzeaz gain, berrikuntza eta teknologia ere lan-ildo estrategikoak dira. Goierriko industria-sarean historikoki sustraituta dagoen berrikuntza-kultura indartzeko, enpresei aukera berriak identifikatzen eta horiek garatzeko beharrezko baliabideak aurkitzen laguntzen zaie.
Azken urteotan, gainera, gero eta garrantzi handiagoa hartu dute enpresen jarraikortasunarekin lotutako proiektuek. Goiekik laguntza eskaintzen du belaunaldi-erreleboa planifikatzeko eta enpresaren etorkizuna bermatzeko prozesuetan.
Era berean, Industria Arloak enpresek garatu nahi dituzten ekimenetarako dirulaguntza eta finantzaketa-aukerak identifikatzen laguntzen du, programa eta deialdi egokienak aztertuz.
Baliabideak
Enpresen lehiakortasuna eta jasangarritasuna indartzeko, Goiekik hainbat baliabide eta zerbitzu eskaintzen ditu, eskualdeko eragileekin elkarlanean.
Besteak beste, enpresaren erreleboa planifikatzeko gida praktikoa, Goierriko Gida Industriala, Barnekintzailetza bultzatzeko prozedura, Berrikuntza Profilak, ETE Digitala, Indargune diagnostiko-zerbitzua, LanMentoring zerbitzua, Lanaren Zentzua egitasmoa eta BeTEK daude.
Tresna horien bidez, enpresek berrikuntza, digitalizazioa, lehiakortasuna, talentuaren kudeaketa eta belaunaldi-erreleboa bezalako erronkei aurre egiteko laguntza jasotzen dute.
NBF eraikina
Goierri Berrikuntza Gunean kokatuta dagoen NBF (Negozio Berrien Fabrika) eraikina Goierriko industria eta berrikuntzaren ekosistemaren erreferenteetako bat da.
Bertan daude Goiekiren bulegoak, Goierri Valleyko hainbat enpresa, enpresa berrientzako inkubategia eta jarduera profesionalerako prestatutako hainbat bilera eta lan-espazio.
Eraikinak 80 pertsonentzako auditorioa, hainbat bilera-gela eta talde-lanerako Office gunea ditu, besteak beste. Eskualdeko enpresek espazio horiek erabiltzen dituzte prestakuntza-saioak, jardunaldi teknikoak, lan-bilerak eta lankidetza-proiektuak garatzeko.
Horrela, NBF Goierriko industria-sarearen topagune eta elkarlanerako gune bihurtu da.
Goierri Valley
2017an sortu zen Goierri Valley, eskualdeko enpresen arteko elkar ezagutza eta elkarlana sustatzeko eta etorkizuneko erronkei erantzuteko proiektuak bultzatzeko.
Gaur egun, Goierriko industria-sareko enpresa traktoreen eta ETEen arteko aliantza da. Berrikuntza, lankidetza eta ezagutzaren partekatzea ditu oinarri, eta tresna garrantzitsua bihurtu da Goierriko industriaren lehiakortasuna indartzeko eta etorkizuneko erronkei modu bateratuan erantzuteko.
Informazio gehiago
Industria Arloari eta eskaintzen dituen zerbitzuei buruzko informazio gehiago nahi izanez gero, jarri harremanetan Goiekirekin:
Telefonoa: 943 16 00 40
